Resumen (aragonés): en iste post, charro sobre a naturaleza d’as normas lingüisticas y foi bella reflexión sobre os procesos de normativización de l’aragonés.
Resumen (español): en este post, hablo de la naturaleza de las normas lingüísticas y lanzo algunas reflexiones sobre los procesos de normativización del aragonés.
Abstract: in this post, I deal with the nature of linguistic norms and I contemplate the Aragonese normativization processes.
Qué ye una norma?
En primeras, totz tenemos claro qué ye una norma, pero quan nos metemos a fundo en iste concepto, paramos cuenta que no ye tan sencillo como pareixeba. Y ye que, en a parola norma se funden dos dimensions a priori opuestas:
(Top-down dimension) Una dimensión va d’o cheneral a os casos particlars, d’alto ent’abaixo, u como gosan de decir os angleses, top-down. Una entidad proposa u imposa, y dimpués a comunidat acepta u ye sozmesa. Una lei gosa d’estar un eixemplo d’iste concepto de norma: ”A norma diz que no se puet fumar dentro d’os avions”. Ixa ye a norma, y dimpués denguno no i fuma.
(Bottom-up dimension) L’atra dimensión ye chusto a’l vies, va d’o particlar a lo cheneral, d’abaixo ent’alto, u como gosan de decir os angleses, bottom-up. A chent actúa d’una determinada traza u tien unas determinadas caracteristicas, y iste comportamiento u caracteristica fa una norma. “Por norma -o normal- ye que as personas midamos menos de 2,20 metros”. A norma surte d’os propios individuos, que por un regular no miden más de 2,20.
Y o repoliu d’as normas ye que, quan se’n fan u surten, en bella mida gosan d’achuntar as dos dimensión.
As normas y as luengas
No cabe dubda que as luengas no son desconoixedoras d’os procesos normativizadors, en todas as dos dimensions, ta totz os suyos componentes (sintacticos, semanticos, graficos). Aquí van bells eixemplos t’o caso d’o castellano:
(Top-down dimension) Una institución como a RAE estableix prous normas, y muitas d’ellas son a la fin asumidas por a comunidat lingüistica. En Aragón somos conscients d’ello. Pero no nomás a RAE y no nomás por imposición “fura” se dan istos procesos. Tamién tecnicismos u extrancherismos responden a ista naturaleza normativa top-down. Mesmo interpresas privadas -con más u menos voluntat- tamién ufren a la comunidat parolas y a propia comunidat las fan suyas, como clínex (Kleenex), whatsapp u whatsappear.
(Bottom-up dimension) Atras vegadas, ye a propia comunidat a que estableix a norma por emplego contino de formulas que, en bells casos, en primeras no yeran aceptadas y a la fin plegan a estar-ne. O eixemplo más claro y recient en castellano d’iste proceso ye o famoso imperativo ‘iros‘.
Asinas, en as normas lingüisticas, en bells casos surten d’entidatz que imposan o proposan solucions a la comunidat. En atros casos, istas normas surten d’a propia comunidat. Y por un regular, en istos procesos as dos dimensions d’a norma s’achuntan: a parola clínex estió ufierta por una interpresa privada, pero calló en a comunidat y a la fin mesmo estió aceptada por a RAE; o imperativo iros surtió d’a propia comunidat, se fació norma (u normal, si se quiere) y a la fin a RAE l’acullió.
Y en o caso de l’aragonés, qué?
En a normativización de l’aragonés, mientras muito tiempo han predominau os modelos top-down: s’han ufierto modelos graficos, gramaticals y lexicos que s’han mirau d’esparricar y mesmo imposar a la comunidat, con resultaus por un regular prou febles y negativos, en parti en estar feitos dende anvistas no lingüisticas u directament mal feitos.
Como critica y choque a ista mala faina, dende fa ya más d’una decada movimientos fuertes han apostau por una normativización bottom-up: tot dende os fablants, o regle quasi queda restrinchiu a refleixar a luenga d’a comunidat patrimonial y prou.
Pero con ista reacción, muitas vegadas se ixublida u se desprecia o component top-down, d’alto ent’abaixo, que toda norma -y por ende, toda norma lingüistica- tien, cayendo en una error prou grau. Y ye que, os dos procesos, top-down y bottom-up, son naturals en tot lo que siga sucheto de norma, y una luenga en ye. Y, como suchetos a normas lingüisticas que’n son, os fablants de luenga aragonesa fan norma (bottom-up) pero tamién reciben y adoptan norma (top-down), y agora mesmo, a onica que son recibindo y adoptando ye a norma d’o castellano. Isto se veye clarament en l’adopción de tecnicismos, neolochismos y extrancherismos, pero no nomás en istas custions. Tamién vocabulario lechislativo u festivo, y por un regular tot o que tien que veyer con nuevas formas de vida, ye sucheto a iste problema.
Asinas, o desprecio a o component top-down de toda normativización, en o caso de l’aragonés, ocasiona istos problemas:
(i) Iste component contina existindo y existirá siempre, y a onica referencia que en a más grant parti d’os casos tienen os fablants, ye a d’o castellano. Muita d’a chent intresada en a normativización de l’aragonés eliden iste component como reacción a lo exceso de normativización top-down que heba predominau enantes.
(ii) A isto se suma que bi ha una grant cantidat de nuevas estructuras lingüisticas suchetas a norma top-down, pos son relacionadas con as nuevas formas de vida. De feito, tot isto en bella mida se conoix entre a chent intresada por a normativización de l’aragonés, pero muitas vegadas nomás lo relacionan con tecnicismos y prou, quan o espectro y l’amplitut d’a normativización lingüistica top-down ye muito más grant.
Se podrá responder que debant de tot, una formula ha d’estar aceptada por a comunidat de fablants. Y no soi decindo lo contrario. Pero apunto que ta que una formula siga aceptada por a comunidat de fablants, primero se l’ha de proposar (emplegando-la). Dimpués se fixará u no como normativa. Si no, a la fin, de tan puristas, aceptaremos parolas ufiertas a la comunidat por interpresas privadas y que pareixen haber callau, como maripís, pero no aceptaremos parolas proposadas por os movimientos neofablants u de normativización y que pareixeban prencipiar a callar como amostranza u chambreta. Y prou que a más grant parti d’as nuevas incorporación serán castellanas.
Y dimpués d’ista parrafada que he mirau de fer o más breu posible, GOYOSO NADAL!
OpenEdition le sugiere que cite este post de la siguiente manera:
Marco Antonio Joven-Romero (26 de diciembre de 2017). Sobre as normas lingüisticas y o caso de l’aragonés: Goyoso nadal. ESTRICALLA. Recuperado 12 de septiembre de 2024 de https://doi.org/10.58079/ojlq
Creigo que as normas son prezisas, más que más ta totas as presonas que quieren aprender ista luenga polidisma, creigo tamién que ye muito importan que tota ra Chen que ama l’aragonés reme chunta t’alantar enta devan.
Ola Castel, muitas gracias por o comentario.
Comparto de tot a esferencia entre comunidatz de variedatz locals y comunidatz neofablants en os procesos top-down y l’analís que fas en iste sentiu.
Aclaro tamién que no considero que a difusión de parolas como ‘amostranza’ u ‘chambreta’ siga un proceso bottom-up. De feito, digo que ye un proceso top-down: “parolas proposadas por movimientos neofablants u de normativización y que pareixeban prencipiar a callar como amostranza u chambreta”. As parolas son proposadas, como bien dices, por entidatz con vocación d’autoridatz lingüisticas (d’astí menciono ‘de normativización’) u en bells casos mesmo por particlars u entidatz que en primeras no tienen ixa vocación, pero que actúan igualment como achents top-down. En qualsiquier caso, “as normas, quan surten, en bella mida gosan d’achuntar as dos dimensions”, u siga, quan callan u prencipian a callar, se conchungan as dimensions top-down y bottom-up, pero no digo que o caso d’istas parolas u de ‘goyoso nadal’ sigan procesos bottom-up.
Garra vegada que m’he feito una vuelta y me soi estau por lugars an que se charran variedatz locals de l’aragonés m’he trobau con a parola chambreta (sí con ‘amostranza’ y en un caso concreto, con ‘goyoso nadal’). Con tot y con ixo, que istas parolas no fan parti en primeras d’as propias variedatz ye una cosa que asumo mientras tot o post y creigo que ista asunción se veye clara, mesmo en a zaguera sentencia-resumen: “ta que una formula siga aceptada por a comunidat de fablants, primero se l’ha de proposar (emplegando-la). Dimpués se fixará u no como normativa”. Si se l’ha de proposar, malament la serán emplegando ya…
Soi d’acuerdo de tot en que no cal ufrir solucions normativizaderas en custions que ya tienen una solución propia y chenuina en aragonés. Por desgracia no soi estau guaire explicito en isto, y probablement habría d’haber-ne estau, pero ye una d’as custions que subchace a ista frase: “s’han ufierto modelos graficos, gramaticals y lexicos que s’han mirau d’esparricar y mesmo imposar a la comunidat, con resultaus por un regular prou febles y negativos, en parti en estar feitos dende anvistas no lingüisticas u directament mal feitos”
Con as zagueras frases, torno a repetir que mientras tot o post parto d’a base que os fablants de variedatz locals de l’aragonés no emplegan istas expresions. En garra momento he dito lo contrario, mesmo lo asumo. Son cosas que antiparti goso de preguntar a buenos amigos y amigas fablants de variedatz, bien por whatsapp, bien quan me convidan a pasar bells días por os suyos lugars.
Y ya ta rematar, pediría más cudiau con frases como “demostra que no tienes dengun amor per la llengua aragonesa i posas per devant cocietos personals”. Yo personalment levo 13 anyadas en istas movidetas, atra chent en leva más y atra chent plega de prencipiar, beluns no tienen l’aragonés como L1 y atros sí, beluns (pocos) han pasau a más gran parti d’a suya vida en o suyo lugar, atros nomás os veranos, atros s’han mercau una casa por alto sin estar o suyo lugar y atros, como yo, denguna d’ixas. Pero totz, qui más qui menos, aportamos un granet d’arena, con muitas horas de voluntariau, levando a luenga an que podemos, y debant de tot cal que nos cudiemos, a lo menos mientras sigamos ubiertos y pensemos en positivo. Me pareix que a reflexión que aquí presento ye, debant de tot, formal, y se’n siga d’acuerdo u no, ye luent de hooliganismos. Por cierto, dito siga de paso, a formula ”goyoso nadal” no la he inventada yo, igual que ista mena de felicitacions no gosan d’estar espontaneas d’os fablants d’as luengas.
Abrazos,
Hola Marco, yo també te queriva fer bell par de comentários.
Comentas els procesos Top-down i Botton-up (terminologia que yo desconoixeva) pero la expllicas ben en el caso del castellano, i me queda prou cllara. La refllexion de cómo apllicas estes fenómenos a l’aragonés, no me pareix guaire acertada; m’expllico.
Top-down: efectivament, i como ben dices, la comunidat de parlladors d’aragonés ha sufriu este proceso. Pero penso que s’ha materializau de dos formas ben diferents que cal matiçar, i hem de diferenciar dos grupos.
Per un costau tenim las comunidat de parlladors de las zonas de uso, que parllan variedaz locals i la mayoria de las veces de forma patrimonial. Estoi d’acuerdo con tu que, en este casos, practicament la única inflluéncia Top-down que tienen, viene del castellano.
Per l’altro costau tenim la comunidat de neo-parlladors, que per norma general no parllan variedaz sino diversos estándards, i que no tiene han heredau la llengua aragonesa de forma patriomonial sino que la han aprendiu (i en moltos casos la están encara aprendent). En este caso, la inflluéncia Top-down no viene del castellano sino de unas autoridaz lingüísticas que agafan voluntariament como referéncia: son estas autoridaz las que difunden i empoderan estes famosos “mals usos”.
Botton-up: aquí, per contra, només hi ha un grupo que fa este proceso (con contadas excepcions); la comunidat de parlladors cllásica, ya que é la unica que tiene competéncias lingüísticas i necesidas pa fer-lo.
Per eixempllo, quan de forma espontánea els parlladors de aragonés veien la “llave inglesa” i la denominan “cllau crecent” i ixa denominacion triunfa en las zonas de uso i s’expande. Ixo seria un proceso Botton-up.
Posas como eixempllo CHAMBRETA i AMOSTRANZA como procesos Botton-up de neo-parlladors, pero no é així. Ixas pallabras s’han establleciu per un procesos Top-down dende autoridaz lingüísticas a la comunidat de neo-parlladors (ben se vale que s’estan ensenyant i promocionant dicá fa no guaire). Dimpués, per qüestions de mediatización de la comunidat neo-parlladora, ha podiu pennetrar en bell parllador, pero no dixan de ser casos molt excepcionals. Si te fas una volta pels llugars on se parlla aragonés i preguntas per ixas pallabras, te llevarás una sorpresa.
Encara així, encara que se dase el caso que la comunidat neo-parlladora crea espontáneament un forma, pa yo no tiene denguna validez quan la comunidat de parlladors ya teniva una pa expresar el mismo concepto.
De la misma forma que quan aprendes francés diues JOYEUX NOËL i no HEUREUX NOËL, quan aprendes aragonés has de dir BUEN NADAL i no GOYOSO NADAL.
Dir “goyoso nadal” demostra que mai t’has relacionau con gent que parlle aragonés i que qui te va ensenyar aragonés no en sabeva.
Promocionar i justificar “goyoso nadal” demostra que no tienes dengun amor per la llengua aragonesa i posas per devant cocietos personals a aprender-la tal i como é.
Salut i bon nadal.